3 этап гэтага сезона сабраў усяго дзясятак удзельнікаў. Радуе тое, што паўторна наведаў турнір наш навічок - Іван Гілевіч. Яго не збянтэжыла тое, што на мінулым чэмпіянаце ён вельмі часта вынімаў шайбы з варот, не засмуціла розніца ў класе і пакуль абсалютна расплывісты небасхіл хуткасці спасціжэння азоў нахока. Дай Бог, каб стойкасці і цярпення, уседлівасці і рызыкі яму хапіла на бліжэйшыя гады. А раней вынік і не прыйдзе). Аня Сліж пад кіраўніцтвам таты таксама далучылася да групы прафесіяналаў. Хоць, забягаючы наперад, скажам, што Анюта да канца кругавога этапу засмуткавала ад бязвыйгрышных матчаў. А звыклыя ўсмешка і азарт змяніліся на сумнае і тужлівае дагульванне матчаў... Ці патрэбен ўсё ж менавіта такі хакей дзецям?...
Астатняя васьмёрка сёння білася не на жыццё, а на смерць. А як жа інакш, бо ўпершыню мы зрабілі такі рэгламент, калі па выніках кругавога этапу ў плэй-оф трапляе толькі чацвёрка гульцоў. Другая чацвёрка разыгрывае медалі Першай лігі і таксама ў серыях. Таму матывацыя сёння была асаблівай.
Пасля згуляных 18-ці тураў лідарам кругавога этапу апынуўся Аляксандр Далгоў з 28-ю ачкамі. Другім стаў Мацвей Шыркавец з 26-ю. Трэцяе месца заняў Андрэй Акінфін з 25-ю. Замкнуў чацвёрку шчасліўчыкаў Эдуард Куратнік з 24-я ачкамі.
Ачка не хапіла Аляксандру Бартошу, ён стаў 5-ым, шосты радок у табліцы заняў Уладзімір Сліж з 19-ю ачкамі. Сёмы - Аляксандр Шыркавец, замкнуў васьмёрку Аляксей Краўчанка. У іх з Аляксандрам аднолькавыя паказчыкі па ачках, але за кошт асабістых сустрэч Аляксандр апынуўся вышэй. Іван з Аняй сваё адыгралі і далей назіралі за гульнямі ў лігах.
У першым паўфінале Першай лігі сышліся Аляксандр Бартош і Аляксей Краўчанка. Тут 4:0.
Калі ў першай пары барацьбы было не сказаць, што шмат, то ў пары Уладзімір Сліж - Аляксандр Шыркавец усё было значна гарачэй. Усе мы памятаем, якую гульню прадэманстраваў Аляксандр на мінулым турніры. Сёння на кругавым этапе ён не паказаў той выніковасці, а вось у гэтай серыі зноў змог усіх здзівіць. Абыграў Валодзю ў першым матчы 5:2, у другім Валодзя адыграўся толькі ў авертайме, трэці матч - і зноў авертайм, але цяпер ужо за Аляксандрам. Чацвёрты матч - чарговы авертайм, зараз перамогу вырывае Уладзімір. Пяты матч - Уладзімір упэўнена перамагае 3:0. У шостым Аляксандр абгульвае Уладзіміра 3:2. Вырашальны матч глядзелі ўсе. Старанні Валодзі былі разбітыя аб абарону Аляксандра, які не даў забіць сабе ні разу, а сам змог аднойчы ўразіць вароты.
Аляксандра Шыркаўца можна павіншаваць з першай сапраўднай і валявой пераможнай серыяй с моцным супернікам. Тым больш, што яшчэ пару дзён таму Аляксандру аднаўлялі сардэчны рытм дэфібрылятарам у рэанімацыі медыцынскай установы. Але прэмію цяпер свайму супрацоўніку прыйдзецца выплаціць добрую!)
Потым у матчы за бронзу Першай лігі Лёша Краўчанка абыграў Валодзю 3:1, які, як мне здалося, страціў усякую матывацыю. Аляксандр Бартош абыграў цёзку Шыркаўца - 4:1.
Прызёры Першай лігі:
Вяртаючыся да тэмы прэмій нельга не спыніцца на яшчэ адным матчы сваіх калегаў (хоць тут цалкам маглі стаяць на коне і адгулы)).
У паўфінале Вышэйшай лігі сустракаліся паміж сабой калегі па цэху і камандзе - Аляксандр Далгоў і Эдуард Куратнік. Якая ж там была барацьба! Надвор'е, аўтамабілі, мацыклеты, гаражы і нерухомасць - столькі розных тэм было паднята за кубкам гарбаты падчас гэтай серыі... Карацей - 0:4 і... адгул у кішэні (а можа яшчэ і прэмія).
А зусім побач Мацвей Шыркавец па-сапраўднаму зламаў супраціў Андрэя Акінфіна - 4:0.
У матчы за 3 месца Аляксандр Далгоў усё ж вырашыў згуляць у хакей. Не без працы, з мінімальнай перавагай у кожным матчы, але абыграў даволі ўдала выступаючага сёння Андрэя Акінфіна - 3:1.
Даўно Эдуард не сустракаўся ў фінале з Мацвеем.
Эдуард узяў першы матч, затым яшчэ 2 і абодва ў авертаймах. Але Мацвей умее збірацца, у чацвёртым ён адыгрывае розніцу, перамогшы ўсухую - 5:0. Затым бярэ яшчэ адзін пераможны матч з мінімальнай перавагай, потым яшчэ матч ён вырывае ў авертайме, зраўняўшы лік у серыі. Але Эдуард ўмее збірацца ані не горш. І ў вырашальным матчы, сабраўшы волю і сілы ў кулак, ён усё ж давёў лік да пераможнага - 5:2.
Прызёры Вышэйшай лігі:
4-ы этап будзе праходзіць 30 лістапада.
Нагадаю ўсім аматарам настольнага хакея, што менавіта 30 лістапада 2013 года прайшоў першы турнір па настольным хакеі, які паклаў пачатак нашай з вамі ўжо 11-ці гадовай гісторыі!
Да сустрэчы, сябры!
Трэба пастарацца ўсім быць, свята ж!
